माण्डवी गाउँपालिका प्यूठानले "महिलाको हक अधिकार : सबैको साझा सरोकार" भन्ने मूल नाराका साथ ५ औं राष्ट्रिय महिला अधिकार दिवस मनाएको छ ।

महिला अधिकारको क्षेत्रमा भएका विभिन्न चार उपलब्धिलाई आधार मानेर सरकारले हरेक वर्ष जेठ १६ गतेलाई राष्ट्रिय महिला अधिकार दिवसको रुपमा मनाउने निर्णय गरेपछि २०७६ सालदेखि यो दिवस मनाउन लागिएको हो । 

आमा वा बुवामध्ये एकजनाको नामबाट पनि नागरिकता, कम्तीमा एक तिहाइ महिलालाई राज्यका सबै संरचनामा सहभागिताको सुनिश्चितता, विभेदकारी कानूनको खारेजी र महिलाप्रति हुने हिंसा अन्त्य गर्ने कुरालाई मुख्य चार उपलब्धीको रुपमा लिइएको छ । माण्डवी गाउँपलिका अध्यक्ष श्री नमराज अधिकारी ज्यू को अध्यक्षतामा संचालन भएको उक्त कार्यक्रममा गाउँपालिका उपाध्यक्ष, वडा अध्यक्ष, विषयगत शाखाका कर्मचारी, गाउँपालिका स्तरीय महिला संजालका अध्यक्ष तथा प्रतिनिधि, बिभिन्न महिला सहकारीका सदस्य लगायत अन्य सरोकारवालाहरुको उपस्थिति रहेको थियो । 

कार्यक्रममा बोल्दै अध्यक्ष नमराज अधिकारीले संविधान र कानुनले दिएको अधिकार प्रयोग गरेर महिलाहरु अगाडि बढ्नु पर्ने बताउनु भएको छ ,साथै अध्यक्ष अधिकारीले सीप,कलाको प्रयोग गरेर महिलाहरु आफै उध्यमशिल हुँदै आत्मनिर्भर हुनपर्ने बताउनु भयो । दिवसको अबसरमा भएको लोक नृत्य प्रतियोगितामा एकता महिला सहकारी सस्था-५ प्रथम , भुवनेश्वरी महिला बचत तथा ऋण सहकारी संस्था-३ दोस्रो  र सुन्नानी महिला बचत तथा ऋण सहकारी संस्था-४ तेस्रो भएका छ्न । कार्यक्रममा उपाध्यक्ष पुर्ण प्रसाद कालाथोकीले विभेद आफैवाट अन्त्य गर्नु पर्ने बताउदै आर्थिक समृद्वि र आत्मनिर्भरताका लागि व्यवसायी हुनुपर्ने बताउनु भएको थियो ।  कार्यपालिका सदस्य वालिका नेपालीले स्वागत मन्तव्य राख्नु भएको कार्यक्रममा प्रमुख प्रशासकीय अधिकृत प्रकाश पाण्डेले अधिकार प्राप्तिको लागि सबै जागरुक हुनु पर्ने बताउनु भयो । कार्यक्रममा महिला उद्यमीद्वारा उत्पादन गरिएका बस्तुहरुको प्रदर्शनीको अवलोकन गरिएको थियो ।  महिला, बालबालिका शाखाका सीता गौतमले संचालन गर्नु भएको कार्यक्रममा  उत्कृष्ट महिला उद्यमीहरुलाइ प्रोत्साहन स्वरुप सम्मान गरिएको थियो ।