माण्डवी गाउँपालिका र स्थानीय विकास प्रशिक्षण प्रतिष्ठानको संयुक्त आयोजनामा मिति २०७९ चैत्र ८ गते देखि १० गते सम्म संचालित "स्थानीय तहको सेवा प्रवाहमा जनप्रतिनिधि र कर्मचारीहरुको भूमिका विषयक’ प्रशिक्षण कार्यक्रम गाउँपालिका उपाध्यक्ष पूर्ण प्रसाद कालाथोकीको अध्यक्षता र गाउँपालिका अध्यक्ष नमराज अधिकारीको प्रमुख आथित्यतामा सम्पन्न भएको छ । उक्त प्रशिक्षण कार्यक्रमको आज अन्तिम दिन प्रतिष्ठानका व्यवस्थापन अधिकृत उदयनाथ खनालले पत्र व्यवहार तथा टिप्पणी लेखन विषयमा र प्रतिष्ठानका बरिष्ठ कम्प्युटर अधिकृत अमित श्रेष्ठले ज्ञान व्यवस्थापन विषयमा प्रशिक्षण दिनुभएको थियो भने करदाता सेवा कार्यालयका कर अधिकृत सनु काफ्लेले सार्वजनिक खरिद प्रक्रिया र स्थानीय तहको उपभोक्ता समिति गठन परिचालन तथा व्यवस्थापन विषयमा प्रशिक्षण दिनुभएको थियो । कार्यक्रमको अन्तिम सेसन प्रतिष्ठानका प्रशिक्षण तथा अनुसन्धान अधिकृत हेमराज थापाले सार्वजनिक जवाफदेहिता र यसका औजारहरुको बारेमा प्रशिक्षण दिनुभएको थियो ।

कार्यक्रममा इलाका प्रशासन कार्यालयका प्रमुख बाबुराम पुरी, प्रमुख प्रशासकीय अधिकृत प्रकाश पाण्डे, वडा अध्यक्ष, गाउँ कार्यपालिका सदस्य, विषयगत शाखा प्रमुख र वडा सचिबहरुको उपस्थित रहेको थियो ।

माण्डवी गाउँपालिकाको सभाहलमा भएको ३ दिने कार्यक्रममा स्थानीय तहमा जनप्रतिनिधिको काम कर्तब्य र अधिकार , स्थानीय तह (वडा समिति र अध्यक्ष) को काम कर्तब्य र अधिकार, स्थानीय आर्थिक उद्यमशिलता, जनप्रतिनिधि र कर्मचारीको सम्बन्ध, सकारात्मक सोंच र तनाव व्यवस्थापन, स्थानीय तहमा सिफारिस प्रक्रिया,स्थानीय तहको बजेट निर्माण प्रक्रिया, विकासका अन्तरसम्बन्धित विषयहरू वजेट कार्यान्वयन, अनुगमन तथा मूल्यांकन,सार्वजनिक जवाफदेहिता र यसका औजारहरू, सार्वजनिक खरिद प्रक्रिया र स्थानीय तहको उपभोक्ता समिति गठन, पत्र व्यवहार र टिप्पणी लेखन, ज्ञान व्यवस्थापन विषयहरुमा जिल्ला प्रशासन कार्यालय प्यूठानका प्रमुख जिल्ला अधिकारी बेद प्रसाद अर्याल, स्थानीय विकास प्रशिक्षण प्रतिष्ठानका व्यवस्थापन अधिकृत उदयनाथ खनाल, प्रशिक्षण तथा अनुसन्धान अधिकृत हेमराज थापा, प्रशिक्षण तथा अनुसन्धान अधिकृत टापेंद्र प्रसाद रिजाल, बरिष्ठ कम्प्युटर अधिकृत अमित श्रेष्ठ, ईलाका प्रशासन कार्यालय जस्पुरका कार्यालय प्रमुख बाबुराम पुरी, करदाता सेवा कार्यालय जस्पुरका कर अधिकृत सनु काफ्लेले सहजीकरण गर्नुभएको थियो ।