समाचार
माण्डवी गाउँपालिकाको १३ औं गाउँ सभा तथा हिउदे अधिवेशन कार्यक्रम
माण्डवी गाउँपालिकाको १३ औं गाउँ सभा तथा हिउदे अधिवेशन सम्पन्न भएको छ । बिहिबार माण्डवी गाउँपालिकाको सभाहलमा चालू आर्थिक बर्ष ०७९/८० को हाल सम्मको प्रगति विवरण तथा विभिन्न निर्णय गर्दै गाउँपालिकाको १३ औं गाउँसभा तथा हिउँदे अधिवेशन सम्पन्न भएको हो ।
गाउँ सभामा आ.व. २०७९/८० को योजना तथा बजेट रकमान्तर, संशोधन सम्बन्धि विवरण तथा चालू आर्थिक बर्ष ०७९/८० को अहिले सम्मको प्रगति विवरण गाउँपालिका उपाध्यक्ष पूर्ण प्रसाद कालाथोकीले प्रस्तुत गर्नु भएको थियो । बेरुजु सम्बन्धि विवरण लेखा समितिका संयोजक दुर्गा प्रसाद आचार्यले प्रस्तुत गर्नु भएको थियो ।
प्रस्तुत गरेको प्रतिबेदन तथा बिधेयकमा सुझाब राख्न गाउँ सभाका सदस्यहरुलाई ३ मिनेटको समय उपलब्ध गराएर सबैको सर्ब सहमतिमा संसोधनहरु पारित गर्दै अधिवेशन सम्पन्न भएको छ ।
सभाले गाउँकार्यपालिकाले गरेका सम्पुर्ण निर्णयहरु, आर्थिक वर्ष २०७९/०८० को हालसम्मको सम्पूर्ण खर्च, आर्थिक वर्ष २०७९/०८० मा गाउँकार्यपालिका बैठकले पारित गरेका नियमावली, कार्यविधि, निर्देशिका, मापदण्डहरु, गाउँपालिकाले करार सेवामा लिएका कर्मचारीहरुको नियुक्ति, आ.व. २०७९/०८० को लागि प्रधानमन्त्री रोजगार कार्यक्रम अन्तर्गत संचालन भएका सम्पूर्ण योजनाहरुको अनुमोदन गरेको छ । सभाले गत असोज १८ गते परेको अविरल वर्षको कारण आएको वाढी पहिरोले ज्यान गुमाउने प्रति शोक व्यक्त गर्दै शोक प्रस्ताव पारित गरेको छ । राहत, उद्धार पुनर्स्थापना खटिने विभिन्न संघ, संस्था, जनप्रतिनिधि तथा कर्मचारी लगायत सम्पूर्णमा धन्यवाद ज्ञापन गर्दै सभाका अध्यक्षले अधिवेशन अन्त्य भएको पत्र सुनाउनु भएको थियो ।
अधिवेशनकै अवसरमा उत्कृष्ठ कार्य सम्पादन गर्ने कर्मचारी तथा स्वास्थ्य स्वयमसेविकालाई नगद रु. ५/५ हजार सहित सम्मान पत्र र दोसल्ला ओढाएर गाउँपालिकाले सम्मान गरेको छ ।
गाउँपालिकाका अध्यक्ष नमराज अधिकारी ज्यूको अध्यक्षतामा सम्पन्न भएको कार्यक्रममा गाउँपालिकाका उपाध्यक्ष पूर्ण प्रसाद कालाथोकी , ५ वटै वडाका वडाध्यक्षहरु,जनप्रतिनिधिहरु, गाउँपालिकामा कार्यरत कर्मचारीहरु, स्वास्थ्य संस्थामा कार्यरत कर्मचारी लगाएतको सहभागिता रहेको थियो ।