माण्डवी गाउँपालिकाका कर्मचारी र जनप्रतिनिधिहरुको 
क्षमता विकासका लागि स्थानीय विकास प्रशिक्षण प्रतिष्ठान, ललितपुर र माण्डवी गाउँपालिका, प्यूठानको संयुक्त आयोजनामा ‘स्थानीय तहको सेवा प्रवाहमा जनप्रतिनिधि र कर्मचारीहरुको भूमिका विषयक’  प्रशिक्षण कार्यक्रम संचालन भएको छ । 
तीन दिनसम्म सञ्चालन हुने उक्त कार्यक्रममा पहिलो दिन जनप्रतिनिधि र कर्मचारी गरि ५० जनाको सहभागीता रहेको थियो । आजको कार्यक्रममा जनप्रतिनिधिको एक वर्षको कार्य अनुभव, स्थानीय तहको जनप्रतिनिधिहरुको काम, कर्तव्य र अधिकार, वडा समिति र वडा अध्यक्षको काम, कर्तव्य र अधिकार, जनप्रतिनिधि र कर्मचारीको सम्बन्ध, सकारात्मक सोच तथा तनाव व्यवस्थापनको विषयमा प्रशिक्षण गरिएको थियो । स्थानीय विकास प्रशिक्षण प्रतिष्ठान, ललितपुरको निर्धारित पाठ्यक्रम, विषयवस्तु, शिक्षण विधि र सामग्री प्रयोग गरि सहभागीहरूलाई चैत्र ८ देखि १० गते सम्म प्रशिक्षण गराइनेछ । आजको कार्यक्रममा प्रतिष्ठानका अनुभवी विज्ञ टापेन्द्र प्रसाद  रिजाल र हेमराज थापाले सहजीकरण गर्नुभएको थियो ।