माण्डवी गाउँपालिका प्यूठानले गाउँपालिकाभित्र एक घर, एक धारा अभियानलाई तीव्र पारेको छ । सोमबार एक कार्यक्रमका माण्डवी गाउँपालिका वडा नं. ३ सल्लिबेशी गाउँमा निर्माण भएका एक घर एक धाराको उद्घाटन गरिएको छ | गाउँपालिका अध्यक्ष श्रीधर रोकाले उक्त धाराको उद्घाटन गर्नुभएको हो |

गाउँपालिकाको ६ लाख ७५ हजार र जनश्रमदानबाट १ लाख ३८ हजार ९ सय २२ गरी जम्मा ८ लाख १३ हजार ९ सय २२ रुपैयाँको लागतमा गाउँका ४८ वडा घरधुरीमा उक्त धारा निर्माण गरिएको हो |

गाउँपालिकाको नीति तथा कार्यक्रममा एक घर, एक धारा अभियान सञ्चालन गर्ने उल्लेख गरिए अनुरुप चालू आर्थिक वर्षमा ३० वटा खानेपानी आयोजना मार्फत यहाँका आठ सय घरधुरीमा घरघरमा धारा पुर्‍याउने लक्ष्यका साथ काम अघि बढाइएको हो ।

गाउँपालिका अध्यक्ष श्रीधर रोकाका अनुसार विभिन्न वडा एवं स्थान विशेषका आधारमा योजना अघि सारिएकामा कतिपय योजना सम्पन्न भइसकेका छन् भने कतिपय सम्पन्न हुने क्रममा छन् । स्थानीय अवस्थाका आधारमा १० देखि २० प्रतिशत जनश्रमदानसहित गाउँपालिकाले खानेपानीका लागि लगभग रु दुइ करोड पन्ध्र लाख छुट्याएको उहाँले जानकारी दिनुभयो ।